Viðskipti erlent

Versti ársfjórðungur í sögu Japan

Samúel Karl Ólason skrifar
Japanskir fjölmiðlar segja samdráttinn ekki hafa verið verri frá seinni heimsstyrjöldinni en samkvæmt AP fréttaveitunni segja yfirvöld í Japan að sambærilegar mælingar hafi byrjað árið 1980.
Japanskir fjölmiðlar segja samdráttinn ekki hafa verið verri frá seinni heimsstyrjöldinni en samkvæmt AP fréttaveitunni segja yfirvöld í Japan að sambærilegar mælingar hafi byrjað árið 1980. AP/Hiro Komae

Annar ársfjórðungur þessa árs var sá versti fyrir efnahag Japan frá því mælingar hófust. Á tímabilinu apríl-júní dróst efnahagur ríkisins saman um 27,8 prósent, samanborið við sama tímabil 2019. Að mestu má rekja samdráttinn til mun minni neyslu Japan og minni útflutnings.

Japanskir fjölmiðlar segja samdráttinn ekki hafa verið verri frá seinni heimsstyrjöldinni en samkvæmt AP fréttaveitunni segja yfirvöld í Japan að sambærilegar mælingar hafi byrjað árið 1980.

Samkvæmt þeim mælingum var versti samdrátturinn 17,8 prósent á fyrsta ársfjórðungi 2009.

Eins og segir í frétt AP þá voru Japanir í vandræðum með þriðja stærsta hagkerfi heimsins áður en heimsfaraldur nýju kórónuveirunnar byrjaði að herja á heiminn. Þau vandræði voru rakin til viðskiptadeilna Bandaríkjanna og Kína.

Félagsforðun og aðrar sóttvarnaraðgerðir gerðu slæmt ástand mun verra.

Í janúar-mars dróst efnahagur Japan saman um 0,6 prósent og í október-desember var samdrátturinn 1,8 prósent.

Japan Times segir að hagfræðingar hafi spáð rúmlega tíu prósenta vexti á næsta ársfjórðungi, júlí-september. Það muni hins vegar taka mörg ár að ná hagkerfinu aftur á sömu slóðir.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×