Viðskipti erlent

Fyrsti stóri við­skipta­samningur Breta eftir Brexit í höfn

Atli Ísleifsson skrifar
Liz Truss, breskur ráðherra málefna alþjóðaviðskipta, greindi frá því í morgun að samkomulag væri í höfn.
Liz Truss, breskur ráðherra málefna alþjóðaviðskipta, greindi frá því í morgun að samkomulag væri í höfn. Getty

Bresk stjórnvöld hafa landað sínum fyrsta stóra viðskiptasamningi eftir formlega útgöngu landsins úr ESB í janúar síðastliðnum.

Samningurinn er milli Bretlands og Japans og er áætlað að viðskipti milli ríkjanna muni aukast um 15,2 milljarða punda, að því er fram kemur í yfirlýsingu frá breska viðskiptaráðuneytinu. Það samsvarar um 2.660 milljarða íslenskra króna á gengi dagsins í dag.

Samkvæmt samningnum munu bresk fyrirtæki njóta fríverslunar þegar kemur að 99 prósent af núverandi útflutningi til Japans.

Toshimitsu Motegi, utanríkisráðherra Japans, segir markmiðið vera að samningurinn taki gildi frá næstu áramótum.

Bretar þurfa að lúta sérstökum aðlögunarreglum á þessu ári þegar kemur að utanríkisverslun til að dempa áhrifin af útgöngunni úr ESB, en frá 1. janúar 2021 mun landið standa á eigin fótum.

Bresk stjórnvöld og ESB eiga enn eftir að ná saman um nýjan viðskiptasamning eftir útgönguna.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×