Sport

Tom Brady tapaði og New England Patriots vann án Tom Brady

Óskar Ófeigur Jónsson skrifar
Þetta var ekki góður sunnudagur fyrir Tom Brady.
Þetta var ekki góður sunnudagur fyrir Tom Brady. AP/Brett Duke

Mörg augu voru á Tom Brady í fyrstu umferð NFL-deildarinnar í gær, bæði honum sjálfum með hans nýja liði Tampa Bay Buccaneers en líka á hans gamla liði New England Patriots.

NFL-deildin er farin aftur á stað en í gær og nótt fór fram fjöldi leikja í fyrstu umferð á nýju tímabili sem fór klakklaust af stað þrátt fyrir heimsfaraldurinn.

Tom Brady spilaði sinn fyrsta leik í NFL-deildinni með öðru liði en New England Patriots sem þurfti á sama tíma að spjara sig án hans. Úrslitin í gær voru hinum 43 ára gamla Tom Brady ekki hagstæð.

Cam Newton, nýr leikstjórnandi New England Patriots, leiddi sitt lið til 21-11 sigurs á Miami Dolphins en Tom Brady og félagar í Tampa Bay Buccaneers þurftu að sætta sig við 34-23 tap á móti New Orleans Saints.

Cam Newton sýndi gamla takta og skoraði meðal annars tvö snertimörk sjálfur með því að hlaupa með boltann í markið.

Tom Brady minnti aftur á móti frekar á fyrirrennara sinn Jameis Winston sem Tampa Bay Buccaneers fórnaði af því að hann var alltaf að henda boltanum frá sér.

Tom Brady kastaði boltanum tvisvar frá sér í leiknum en þetta er í fyrsta sinn síðan árið 2003 sem hann tapar tveimur boltum í fyrsta leik tímabilsins.

Hlauparinn Alvin Kamara skoraði tvö snertimörk fyrir New Orleans Saints og hinn 41 árs gamli Drew Brees leiddi lið sitt til sigurs. Þarna voru því að mætast tveir leikstjórnendur á fimmtugsaldri en það hafði aldrei gerst áður.

Leikstjórnendurnir Lamar Jackson, Russell Wilson og Aaron Rodgers átti allir flotta leik í sigrum sinna liða.

Lamar Jackson átti þrjár snertimarkssendingar í 38-6 stórsigri Baltimore Ravens á Cleveland Browns, 31 af 35 sendingum Russell Wilson heppnuðust og hann gaf fjórar snertimarkssendingar í 38-25 sigri Seattle Seahawks á Atlanta Falcons og þá gaf Aaron Rodgers þrjár af fjórum snertimarksendingum sínum á Davante Adams þegar Green Bay Packers vann 43-34 sigur á Minnesota Vikings.

Það voru líka óvænt úrslit því Jacksonville Jaguars og Washington Football Team unnu bæði sína leiki en flestir höfðu búist við mjög erfiðum tímabilum hjá þeim. Þau lenti bæði undir í sínum leikjum en komu til baka og unnu stemmningssigra.

Los Angeles Rams vígði líka nýja leikvanginn sinn með sigri á bitlausu liði Dallas Cowboys.

Öll úrslitin í NFL-deildinni í nótt:

  • Los Angeles Rams - Dallas Cowboys 20-17
  • Atlanta Falcons - Seattle Seahawks 25-38
  • Baltimore Ravens - Cleveland Browns 38-6
  • Buffalo Bills - New York Jets 27-17
  • Carolina Panthers - Las Vegas Raiders 30-34
  • Detroit Lions - Chicago Bears 23-27
  • Jacksonville Jaguars - Indianapolis Colts 27-20
  • Minnesota Vikings - Green Bay Packers 34-43
  • New England Patriots - Miami Dolphins 21-11
  • Washington Football Team - Philadelphia Eagles 27-17
  • Cincinnati Bengals - Los Angeles Chargers 13-16
  • New Orleans Saints - Tampa Bay Buccaneers 34-23
  • San Francisco 49ers - Arizona Cardinals 20-24
NFL



Fleiri fréttir

Sjá meira


×