Erlent

Fjöldi flótta­manna gæti náð einni og hálfri milljón um helgina

Árni Sæberg skrifar
Filippo Grandi, yfirmaður flóttamannastofnunar Sameinuðu þjóðanna.
Filippo Grandi, yfirmaður flóttamannastofnunar Sameinuðu þjóðanna. Eduardo Parra/Getty

Nú þegar hefur 1,3 milljón flóttamanna flúð Úkráinu á þeim tíu dögum sem liðnir eru frá upphafi innrásar Rússa í landið. Filippo Grandi, yfirmaður flóttamannastofnunar Sameinuðu þjóðanna, telur fjöldann munu ná einni og hálfri milljón fyrir helgarlok.

„Þetta er örast stækkandi flóttamannakrísa sem við höfum séð í Evrópu frá endalokum seinni heimstyrjaldar,“ segir hann í samtali við Reuters.

Þá segir hann þá sem þegar hafa flúið flesta fara til ættingja og vina sem þegar búi í Evrópu utan Úkraínu. Hann varar þó við að staðan gæti flækst þegar fleiri flóttamenn streyma frá Úkraínu.

Landamæri Póllands galopin

Af þeim 1,3 milljón manns sem flúð hafa Úkraínu hafa Pólverjar þegar tekið við 800 þúsund, að sögn Pawel Szefernaker, innanríkisráðherra Póllands. Ríflega eitt hundrað þúsund hafi komið til landsins síðastliðinn sólarhring.

Peter Szijjarto, utanríkisráherra Ungverjalands, segir liðlega 140 þúsund flóttamenn hafa komið til landsins.

Rúmenar hafa tekið við tæplega tvö hundruð þúsund flóttamönnum frá Úkraínu og búist er við því að rúmenska þingið samþykki fjáraukalög til að fjármagna hýsingu 70 þúsund manns á dag, að meðaltali, í þrjátíu daga.

Þá segir landamæralögregla Búlgaríu að 20 þúsund manns hafi komið til landsins síðustu tíu daga.

Innrás Rússa í Úkraínu Sameinuðu þjóðirnar Flóttamenn
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið